世事真吊詭，撈了一點油水，但換隻手便財散人安樂。別以為二千元袋袋平安，其實計落早前眼腫和豬流感的醫生費，已經去了七七八八。正如以前JL感歎謂，「你個砵只係得咁大，再多俾你都係漏咗去！」果然一語道破。

哥哥又好怪，話唔想俾亞嫂知佢中了六合彩，想話瞞住佢，又或者說中獎的是老媽。佢話亞嫂會忍唔住話俾外家知，到時就會好多人嚟屈佢飲飲食食，隨時仲要嘔凸！

我真係唔明白呢種夫妻關係。高興的小事，點會唔同伴侶分享？如果大家有協議唔講，亞嫂係咪仲會咁口疏？佢外家啲人係咪屈人狂？再者，人哋屈你，一定要就範架咩？你冇主見、冇牙力架咩？亞嫂唔會做和事老架咩？

一家唔知一家事，呢次連老媽都唔俾意見，話哥哥咁大個仔叫佢自己處理。